ᲠᲝᲛᲔᲚᲘ ᲡᲝᲪᲘᲐᲚᲣᲠᲘ ᲥᲡᲔᲚᲘ ᲡᲭᲘᲠᲓᲔᲑᲐ ᲠᲔᲐᲚᲣᲠᲐᲓ ᲨᲔᲜᲡ ᲑᲘᲖᲜᲔᲡᲡ?
Facebook, Instagram, TikTok, თუ LinkedIn? ბიზნესისთვის სოციალური ქსელის არჩევისას ხშირად პირველი აზრი ასეთია: „ალბათ ყველგან უნდა ვიყოთ.“ შედეგად იქმნება ოთხი გვერდი, რომლებზეც ერთი და იგივე პოსტი სხვადასხვა ზომით ქვეყნდება. ცოტა ხანში კონტენტის მომზადება დამღლელი ხდება, შედეგები მოლოდინს ვერ ამართლებს და ჩნდება ეჭვი, რომ სოციალური მედია კონკრეტული ბიზნესისთვის უბრალოდ არ მუშაობს. სინამდვილეში პრობლემა შეიძლება სოციალურ მედიაში კი არა, არასწორად შერჩეულ პლატფორმაში იყოს. ყველა სოციალურ ქსელს თავისი აუდიტორია, ქცევის წესი და ძლიერი მხარე აქვს. ამიტომ კითხვაზე - „რომელი პლატფორმაა საუკეთესო?“ - ერთი უნივერსალური პასუხი არ არსებობს. სწორი კითხვაა: სად არიან შენი მომხმარებლები და რა ტიპის ურთიერთობა უნდა ააწყო მათთან?
სანამ პლატფორმას აირჩევ, უპასუხე ოთხ კითხვას
არჩევანის დაწყება ანგარიშის შექმნით არ ღირს. ჯერ საკუთარ ბიზნესზე უნდა იცოდე:
-
ვის ელაპარაკები? ვინ არის შენი მომხმარებელი - კერძო პირი თუ კომპანია? რამდენი წლისაა? რას აკეთებს და რა აინტერესებს? ისეთი სოციალური ქსელი უნდა აირჩიო, სადაც ეს ადამიანი უკვე ატარებს დროს.
-
რას სთავაზობ? ტანსაცმელი, საკვები, საკონსულტაციო მომსახურება და პროგრამული უზრუნველყოფა ერთნაირად ვერ გაიყიდება. ზოგ პროდუქტს ვიზუალური წარმოდგენა სჭირდება, ზოგს - სიღრმისეული ახსნა, ზოგს კი ნდობის ხანგრძლივად შენება.
-
რა ტიპის კონტენტის შექმნა შეგიძლია რეგულარულად? თუ TikTok-ს მხოლოდ იმიტომ ირჩევ, რომ პოპულარულია, მაგრამ ვიდეოების გადასაღებად არც დრო გაქვს და არც რესურსი, პლატფორმა დიდხანს ვერ იმუშავებს. კარგი არხი ისიცაა, რომლისთვისაც ხარისხიანი კონტენტის შექმნას სტაბილურად შეძლებ.
-
რა არის შენი მიზანი? გინდა მეტი შეკვეთა მიიღო, ცნობადობა გაზარდო, პროფესიული რეპუტაცია შექმნა, პარტნიორები იპოვო თუ მომხმარებელთან ყოველდღიური კავშირი შეინარჩუნო? სხვადასხვა მიზანს ხშირად სხვადასხვა პლატფორმა ემსახურება.
Facebook - როცა ფართო აუდიტორია და ინფორმაციის სრულად მიწოდება გჭირდება
Facebook ბევრი ბიზნესისთვის კვლავ პრაქტიკული პლატფორმაა, განსაკუთრებით მაშინ, როცა პროდუქტი ან მომსახურება ფართო ასაკობრივ ჯგუფს ეხება და მომხმარებელს გადაწყვეტილების მისაღებად მეტი ინფორმაცია სჭირდება. აქ შეგიძლია ერთ სივრცეში გააერთიანო ტექსტი, ფოტო, ვიდეო, ბმული, ღონისძიება, შეთავაზება და მომხმარებელთა შეფასებები. Facebook-ის ჯგუფები კი კონკრეტულ თემაზე ან ლოკაციაზე ორიენტირებულ აუდიტორიასთან მისასვლელად დამატებითი შესაძლებლობაა.
Facebook შეიძლება გამოგადგეს, თუ:
- ადგილობრივი ბიზნესი გაქვს;
- სხვადასხვა ასაკის მომხმარებელს ემსახურები;
- გჭირდება დეტალური ინფორმაციის, სიახლეების ან ბლოგების გაზიარება;
- მომხმარებლები ხშირად გიკავშირდებიან კითხვებით;
- შენს სფეროში თემატური ჯგუფები მნიშვნელოვან როლს ასრულებს;
- ფასიანი რეკლამით კონკრეტულ აუდიტორიამდე მისვლა გინდა.
მაგალითად, Facebook კარგი არჩევანი შეიძლება იყოს კლინიკისთვის, სასწავლო ცენტრისთვის, საოჯახო სასტუმროსთვის, მომსახურების ადგილობრივი ბიზნესისთვის ან ონლაინმაღაზიისთვის, რომელსაც სხვადასხვა ტიპის მომხმარებელი ჰყავს. Facebook-ზე გვერდის არსებობა მხოლოდ შეთავაზებების გამოქვეყნებას არ ნიშნავს. თუ ყველა პოსტით რაღაცის გაყიდვას ცდილობ, აუდიტორიას შენთან დარჩენის მიზეზი მალე გამოელევა.
Instagram - როცა პროდუქტის ან ბრენდის დანახვა მნიშვნელოვანია
Instagram ვიზუალური შთაბეჭდილების, ბრენდის ხასიათისა და ყოველდღიური კონტაქტის პლატფორმაა. აქ ხშირად ჯერ ინტერესს ქმნი და მხოლოდ შემდეგ მიგყავს მომხმარებელი შეძენამდე. ფოტოები, Reels, Stories და კარუსელები საშუალებას გაძლევს პროდუქტი სხვადასხვა მხრიდან აჩვენო, მოჰყვე შექმნის პროცესს, გააზიარო მომხმარებლის გამოცდილება და ბრენდის გარშემო ერთიანი ვიზუალური სამყარო ააწყო.
Instagram შეიძლება გამოგადგეს, თუ:
- ვიზუალურად საინტერესო პროდუქტი ან მომსახურება გაქვს;
- შენი არჩევისას სტილს, ატმოსფეროსა და ემოციას დიდი მნიშვნელობა აქვს;
- მომხმარებელთან ხშირი და უშუალო ურთიერთობა გჭირდება;
- შეგიძლია ფოტოებისა და მოკლე ვიდეოების რეგულარულად შექმნა;
- გინდა, მომხმარებელმა არა მხოლოდ პროდუქტი, არამედ ბრენდის ხასიათიც დაინახოს.
Instagram განსაკუთრებით ხელსაყრელია მოდის, სილამაზის, კვების, ინტერიერის, მოგზაურობის, ფიტნესისა და ხელნაკეთი პროდუქციის სფეროებისთვის. თუმცა ეს მხოლოდ „ლამაზი ნივთების“ პლატფორმა არ არის, მომსახურების ბიზნესსაც შეუძლია პროცესები, შედეგები, გუნდი და ცოდნა ვიზუალურად საინტერესო ფორმით აჩვენოს.
რისი გათვალისწინება ღირს - კარგი ვიზუალი ყურადღებას იპყრობს, მაგრამ მკაფიო სათქმელის გარეშე ბრენდი შეიძლება მხოლოდ ლამაზ გვერდად დარჩეს. დიზაინი, ტექსტი და კონტენტის მიზანი ერთმანეთთან უნდა მოდიოდეს თანხვედრაში.
TikTok - როცა ყურადღების მიქცევა და ახალი აუდიტორიის აღმოჩენა გინდა
TikTok მოკლე ვიდეოების, სწრაფი თხრობისა და აღმოჩენის პლატფორმაა. აქ მომხმარებელი მხოლოდ იმ გვერდების კონტენტს არ ხედავს, რომლებსაც უკვე იცნობს. ამიტომ საინტერესო ვიდეოს შეუძლია ახალ აუდიტორიამდე ბრენდის ცნობადობის გარეშეც მიაღწიოს.
TikTok შეიძლება გამოგადგეს, თუ:
- შენი პროდუქტის გამოყენების ან შექმნის პროცესის ჩვენება შეგიძლია;
- გაქვს პრაქტიკული ცოდნა, რომელიც მოკლე და გასაგებ ვიდეოებად გარდაიქმნება;
- ბრენდის ადამიანური მხარის გამოჩენა გინდა;
- მზად ხარ სხვადასხვა ფორმატი მოსინჯო და შედეგებით ისწავლო;
- შენს სფეროში საინტერესო შეკითხვები, მითები, შეცდომები.
TikTok-ზე კარგად შეიძლება იმუშაოს რესტორანმა, სილამაზის სფეროს სპეციალისტმა, ონლაინმაღაზიამ, უძრავი ქონების აგენტმა, საგანმანათლებლო ბიზნესმა ან მცირე საწარმომ. ხშირად ყველაზე საინტერესო კონტენტი იქმნება არა დადგმული რეკლამით, არამედ რეალური პროცესის, პროფესიული გამოცდილებისა და ყოველდღიური სიტუაციების ჩვენებით.
რისი გათვალისწინება ღირს - TikTok-ზე წარმატება ყველა პოპულარული ტრენდის გამეორებას არ ნიშნავს. ტრენდი მხოლოდ მაშინ არის ღირებული, როცა ის ბრენდის სათქმელსა და აუდიტორიას ბუნებრივად ერგება.
LinkedIn - როცა შენი მომხმარებელი სხვა ბიზნესი ან პროფესიონალია
LinkedIn პროფესიული ნდობის, კავშირებისა და კომპეტენციის წარმოჩენის სივრცეა. თუ შენი პროდუქტი ან მომსახურება კომპანიებისთვისაა შექმნილი, გადაწყვეტილების მიმღებ პირებთან საუბარი სწორედ აქ შეიძლება იყოს ყველაზე მიზნობრივი. ამ პლატფორმაზე შეგიძლია გააზიარო ინდუსტრიის ცოდნა, კომპანიის სიახლეები, დასრულებული პროექტები, კვლევები, გუნდის გამოცდილება და პროფესიული ხედვა. LinkedIn-ზე ხშირად მნიშვნელოვანია არა მხოლოდ კომპანიის გვერდი, არამედ მისი დამფუძნებლებისა და გუნდის წევრების პირადი პროფილებიც.
LinkedIn შეიძლება გამოგადგეს, თუ:
- სხვა კომპანიებს ემსახურები;
- შენი გაყიდვის პროცესი ნდობასა და პროფესიულ ავტორიტეტს ეყრდნობა;
- გინდა პარტნიორების, ინვესტორების ან თანამშრომლების მოძიება;
- გაქვს გამოცდილება და ცოდნა, რომლის გაზიარებაც ინდუსტრიისთვის ღირებულია;
- მუშაობ საერთაშორისო ან პროფესიულ აუდიტორიასთან.
LinkedIn კარგი არჩევანია საკონსულტაციო, ტექნოლოგიური, ფინანსური, იურიდიული, HR, ლოგისტიკური და სხვა B2B ბიზნესებისთვის. თუმცა აქ მხოლოდ ოფიციალური განცხადებების გამოქვეყნება საკმარისი არ არის. ადამიანებს აინტერესებთ კომპანიის პოზიცია, გამოცდილება და ის ადამიანები, რომლებიც მის უკან დგანან.
რისი გათვალისწინება ღირს - პროფესიული ტონი უსახურ და ზედმეტად ოფიციალურ ენას არ ნიშნავს. LinkedIn-ზეც ადამიანები კითხულობენ ადამიანებისვე დაწერილ ტექსტებს.
როგორ აირჩიო?
თუ არჩევანის მარტივი ფორმულა გჭირდება:
- ფართო ან ადგილობრივი აუდიტორია, დეტალური ინფორმაცია და მომხმარებელთან კომუნიკაცია - Facebook;
- ვიზუალური პროდუქტი, ბრენდის ატმოსფერო და ყოველდღიური ურთიერთობა - Instagram;
- მოკლე ვიდეო, აღმოჩენა, ცნობადობა და ადამიანური კონტენტი - TikTok;
- B2B ურთიერთობები, პროფესიული რეპუტაცია და ბიზნესკავშირები - LinkedIn.
ეს დაყოფა საბოლოო წესი არ არის. ერთი და იგივე ბიზნესს ორი ან მეტი პლატფორმაც შეიძლება სჭირდებოდეს, თუ თითოეულს განსხვავებული ფუნქცია აქვს. მაგალითად, არქიტექტურულ სტუდიას შეუძლია Instagram-ზე დასრულებული პროექტები აჩვენოს, LinkedIn-ზე კი პროფესიული გამოცდილება და ბიზნესპარტნიორობები გააზიაროს. კაფემ Instagram-ზე ვიზუალური სურვილი შექმნას, TikTok-ზე კულისები აჩვენოს და ადამიანურ ამბებს მოჰყვეს, Facebook-ზე კი მენიუ, მისამართი და ღონისძიებები გაავრცელოს. მთავარია, პლატფორმები ერთმანეთს არ იმეორებდეს, თითოეულს თავისი ფუნქცია-დანიშნულება უნდა ჰქონდეს.
აუცილებლად უნდა იყოს ბიზნესი ყველა სოციალურ ქსელში? არა.
ოთხ ნახევრად მიტოვებულ გვერდს ხშირად ერთი ან ორი კარგად მართული პლატფორმა სჯობს. ყველა არხზე ერთდროულად გამოჩენა მეტ დროს, ბიუჯეტსა და განსხვავებული ფორმატის კონტენტს მოითხოვს. თუ ამ რესურსს ვერ გამოყოფ, შედეგიც გაიფანტება.
დასაწყისისთვის აირჩიე ერთი ძირითადი პლატფორმა, სადაც შენი აუდიტორია და ბიზნესმიზანი ყველაზე კარგად იკვეთება. განსაზღვრე, რას უნდა აკეთებდეს ეს არხი, გამოსცადე რამდენიმე კონტენტფორმატი და დააკვირდი არა მხოლოდ მოწონებებს, არამედ რეალურ შედეგებსაც: შეტყობინებებს, ვებსაიტზე გადასვლებს, მოთხოვნებს, გაყიდვებს ან პროფესიულ კავშირებს. მეორე პლატფორმა მაშინ დაამატე, როცა ზუსტად გეცოდინება, რატომ გჭირდება და რა განსხვავებულ როლს შეასრულებს.
თუ სწორი ადგილის პოვნა, პლატფორმების ფუნქციების განსაზღვრა ან მათი ყოველდღიური მართვა გჭირდება, სწორედ აქ შეგვიძლია საქმეში ჩავერთოთ ჩვენ. ბურთულაში სოციალური მედიის მართვას პოსტების კალენდრით არ ვიწყებთ. ჯერ ვარკვევთ, სად არის შენი აუდიტორია, რისი თქმა სჭირდება ბრენდს და რა როლი უნდა შეასრულოს თითოეულმა არხმა. შემდეგ უკვე ამ პასუხების გარშემო ვაწყობთ სტრატეგიას, კონტენტსა და ყოველდღიურ კომუნიკაციას.
თუ ამ პროცესში პარტნიორი დაგჭირდება, დაგვიკავშირდი hello@burtula.com